धर्म/संस्कृति
Mar 20, 2020
पशुपतिको वाग्मती गङ्गा आरतीमा २५ जनाभन्दा बढी उपस्थित नहुने
काठमाडौँ,  चैत ७ पशुपति क्षेत्र विकास कोषले पशुपति क्षेत्रमा प्रत्येक दिन बेलुकी हुने गरेको वाग्मती गङ्गा आरतीमा शनिबारदेखि २५ जनाभन्दा बढी उपस्थित नगराउन निर्देशन दिएको छ । कोरोना भाइरसको सङ्क्रमणबाट भक्तजनलाई बचाउन आवाज ननिकाली आरतीको विधि पूरा गर्न निर्देशन दिइएको कोषका सदस्यसचिव डा प्रदीप ढकालले राससलाई जानकारी दिनुभयो । “कोषले भक्तजनमाथि शासन गर्न खोजेको होइन, रोगको सन्त्रासबाट बचाउन खोजेको हो, मन्दिरमा दर्शनका लागि आउनु हुने भक्तजनलाई पनि २५ जनाभन्दा धेरैको सङ्ख्यामा जम्मा नहुन र दुई मिटरको दूरीमा बस्न अनुरोध गरिएको छ”, उहाँले भन्नुभयो । यसका लागि कोषले पशुपति क्षेत्रमा चारवटै सुरक्षा निकायलाई समन्वयात्मक रुपमा परिचालन गरेको छ । भक्तजनमा रोगको सङ्क्रमण फैलन नदिने गरी व्यवस्था मिलाइएको कोषले जनाएको छ । सजग भएर भीड नगर्न र कोषको अनुरोधलाई सहज रुपमा स्वीकार गर्न पनि सदस्य सचिव ढकालले आह्वान गर्नुभयो । कोषको निर्देशनानुसार शनिबारदेखि १० जनाको समूहले आरती गर्ने भक्तजन र सहयोगीसमेत गरी २५ जनाभन्दा बढी उपस्थित नहुने गरी व्यवस्था मिलाइएको श्री पशुपतिनाथ एवं वाग्मती गङ्गा आरती सेवा समितिका कोषाध्यक्ष नारायणप्रसाद पौडेलले बताउनुभयो । पशुपतिमा विसं २०६३ साउनको तेस्रो सोमबारदेखि वाग्मतीको गङ्गा आरती शुरु भएको हो । भारतको बनारसमा हुने गङ्गा आरतीको स्वरुपमा त्यहीँबाट सामग्री र जनशक्ति ल्याएर कार्यक्रम शुरु गरिएको थियो । त्यसबेलादेखि शुरु गरिएको आरती आजसम्म निरन्तर चलिरहेको छ । आरतीको विधि नछोडी साउन्ड सिस्टम बन्द गरेर भीडभाड नगर्ने गरी तयारी गरिएको पनि उहाँले जानकारी दिनुभयो । सामान्य दिनमा पनि पशुपतिको आरतीमा हजारौँको सङ्ख्यामा भक्तजन उपस्थित हुने गरेका थिए । विशेष चाडपर्वका बेलामा त सङ्ख्या अझ बढ्ने गरेको छ । –––


प्रतिक्रिया पठाउनुस्
नाम
ईमेल
ठेगाना
प्रतिक्रिया
क्याप्चा   [Reload Image]
 
 

प्रतिक्रियाहरु



अरु समाचारहरु

Video Gallery
  • मेरी बास्सै मेरी बास्सै
  • Video Video